საქართველოს ტექნიკური უნივერსიტეტის აგრარული მეცნიერებების და ბიოსისტემების ინჟინერინგის ფაკულტეტზე არსებულ მიკრობიოლოგიის ლაბორატორიაში, პროფესორ ლია ამირანაშვილის ხელმძღვანელობით, მაგისტრატურისა და დოქტორანტურის საგანმანათლებლო პროგრამების სტუდენტები რამდენიმე მნიშვნელოვან და უნიკალურ კვლევას ატარებენ. მიკრობიოლოგიის ლაბორატორიაში მიმდინარეობს ტენილი ყველის დამზადების ტექნოლოგიის მეცნიერული შესწავლა, ასევე სტუდენტები პროპიონჟავური სასმელი იოგურტის მიღებაზე, ასევე, პომიდვრის დაავადების გამომწვევი სოკოების საწინააღმდეგო ბაქტერიებისა და სოკოების გამოყოფაზე და მათი თვისებების შესწავლაზე მუშაობენ. როგორც პროფესორი ლია ამირანაშვილი აცხადებს, ტენილი ყველის მეცნიერული შესწავლა საქართველოში პირველად მოხდა. ასევე, პირველად საქართველოში, საქართველოს ტექნიკური უნივერსიტეტის დოქტორანტმა დაიწყო მუშაობა პრობიომჟავური სასმელი იოგურტის მისაღებად. „ტენილი ყველი მეცნიერულად დღემდე შესწავლილი არ იყო. ეს არის ტრადიციული არტიზანული მესხური ყველი, რომლის წარმოება ბოლო პერიოდში გააქტიურდა, თუმცა, ფაქტობრივად, მესხეთის მხოლოდ ორ სოფელში მზადდება. ჩვენ შევისწავლეთ არსებული ლიტერატურა და, შეიძლება ითქვას, რომ მწირი ეთნოგრაფიული მონაცემების გარდა, რაიმე მეცნიერული კვლევა ტენილი ყველის მიკრობიოლოგიური, ფიზიკურ-ქიმიური და სენსორული მახასიათებლების შესწავლის თვალსაზრისით, ვერ მოვიძიეთ. ამდენად, თამამად შეიძლება ვთქვათ რომ საქართველოს ტექნიკურ უნივერსიტეტში პირველად მოხდა ტენილი ყველის მეცნიერული შესწავლა. ტრადიციული მეთოდით, ტენილი ყველი მზადდება ცხიმმოხდილი, არატრადიციული მეთოდით კი ცხიმიანი რძისგან დამზადებული ე.წ. „თავი-ყველისგან“. ხუთი-ექვსი თვის განმავლობაში მომზადებული ყველის დამწიფება ხდება ქოთანში ან შუშის ქილაში. სასურსათო ტექნოლოგიის სადოქტორო პროგრამის დოქტორანტმა ნინო ნადირაშვილმა, კვლევის პერიოდში, მოიპოვა ფრანგულ-ქართული უნივერსიტეტის სადოქტორო სტიპენდია, რომლის ფარგლებში, საფრანგეთში, ლილის უნივერსიტეტში ორი თვის განმავლობაში სწავლობდა ტენილი ყველის თვისებებს. კვლევა დაიწყო ჩვენთან, თუმცა გრანტის ფარგლებში საფრანგეთში გაგრძელდა. ორივე, საქართველოს ტექნიკურ და ლილის უნივერსიტეტებში, ჩატარდა დეგუსტაცია. თითოეული უნივერსიტეტიდან 62-62-მა სტუდენტმა,ფაკულტეტის თანამშრომელმა მეცნიერმა და ექსპერტმა მიიღეს მონაწილეობა. საქართველოში დიდი მოწონება დაიმსახურა არატრადიციული მეთოდით, ცხიმიანი რძისგან დამზადებულმა ტენილმა ყველმა, როგორც საგემოვნო თვისებებით, ასევე, სტრუქტურით და ცალკეული კომპონენტებით“ - აცხადებს ლია ამირანაშვილი. მიკრობიოლოგიის ლაბორატორიაში, საქართველოში პირველად, სასურსათო ტექნოლოგიის სადოქტორო პროგრამის დოქტორანტი ტერეზა პაპიანი, მუშაობს პრობიომჟავური სასმელი იოგურტის მიღებაზე. „პრობიომჟავური იოგურტის მიღება საქართველოში არ ხდება. თამამად შემიძლია აღვნიშნო, რომ დოქტორანტი მუშაობს ახალი სასმელის მიღებაზე, რომელიც ჰგავს მაწონს, მაგრამ მასში დამატებით არის ჯანმრთელობისათვის სასარგებლო პრობიოტიკული პროპიონმჟავა ბაქტერიები. ეს არის კვლევა, რომლის შედეგებით, კერძო სექტორი თუ დაინტერესდება, შეიძლება, მომხმარებელს ახალი ფერმენტირებული რძის პროდუქტი მიეწოდოს. ასევე აღსანიშნავია აგრარული ტექნოლოგიების სამაგისტრო პროგრამის მაგისტრანტ თამუნა მოდებაძის კვლევა. ის სწავლობს პომიდვრის დაავადების ბიოკონტროლის გზებს, რისთვისაც მან დაავადებული პომიდვრის მცენარიდან და ნაყოფებიდან გამოყო ფიტოპათოგენური სოკოები და მათი ანტაგონისტი ბაქტერიები და სოკოები და სწავლობას მათ თვისებებს. ყველა კვლევას თავისი დანიშნულება აქვს და ვფიქრობ, ჩვენს ლაბორატორიაში მიღებული შედეგები საქართველოს სოფლის მეურნეობის განვითარების საქმეში თავის წვლილს შეიტანს“ - აცხადებს ლია ამირანაშვილი. ინფორმაციისთვის, საქართველოს ტექნიკური უნივერსიტეტის აგრარული მეცნიერებების და ბიოსისტემების ინჟინერინგის ფაკულტეტზე არსებული მიკრობიოლოგიის ლაბორატორია 2016 წლიდან მოქმედებს, რომელიც უახლესი ტექნიკითაა აღჭურვილი და დღეს ერთ-ერთი საუკეთესო ლაბორატორიაა, სადაც დარგის სპეციალისტები, მეცნიერები და სამივე საფეხურის საგანმანათლებლო პროგრამების სტუდენტები პრაქტიკულ მეცადინეობებს გადიან, ატარებენ მეცნიერულ კვლევებს.